घरमुली महिला हुन्छन रानाथारु समुदायकाे

कैलारी संवाददाता 

धनगढी, २२ पुस ।सुदूरपश्चिम प्रदेशके ५ स्थानीय तह अभिन फेन बैंकिंग सेवाके पहुँच बाहेर रहल बा ।
प्रदेश सरकारसे सक्कु स्थानीय तहमे बैंकिंग पहुँच पुगाके वित्तीय साक्षरता अभियानहे तीव्रता डेना नीति लेलेसे फेन अभिनसम बैंकिंग सेवा पुगे नैसेकल हो ।
नेपाल राष्ट्र बैंक धनगढीके अनुसार सुदूरपश्चिम प्रदेशके बझाङ ओ बाजुरा जिल्लास्थित स्थानीय तह अभिन फेन बैंक तथा वित्तीय संस्थाके पहुँचसे बाहेर रहल बा । बझाङस्थित काडा ओ थलरा गाउँपालिका ओ बाजुराके पाण्डप गुफा ओ गौमुुल गाउँपालिकामे बैक पुगे नैसेकल हो । नेपाल राष्ट्र बैंक धनगढीके निर्देशक निश्चल अधिकारी उ ५ गाउँपालिकामने अभिनसम बैंक शाखा पुगलवारे जानकारी नैआइल बटैलै ।
प्रदेश सरकारके आन्तरिक मामिला तथा योजना मन्त्रालय हाले वित्तीय सम्मेलन करके सक्कुु तहमे वित्तीय पहुँच पुगैना उद्घोष करल रहे । उ सम्मेलनमार्फत पुस मसान्तसम हिमालयन बैंक बाजुराके पाण्डप गुफा ओ स्वामी कार्तिक गाउँपालिकामे शाखा विस्तार कर्ना प्रतिवद्धता जनाइल रहे । कलेसे कुमारी बैंक बझाङके थलरा गाउँपालिका ओ बाजुराके गौमुल गाउँपालिकामे शाखा विस्तार कर्ना जनाइल रहे । मने अभिनसम शाखा विस्तार हुई नैसेकल हो ।
ओस्टके, बहुट विकट मानजिना बझाङके काडा गाउँपालिकामे एभरेष्ट बैंक शाखा विस्तार कर्ना हुइल बा । मने आधारभूत पूर्वाधार समेत नैरहल उ काडा गाउँपालिकामे कहियासम शाखा विस्तार कर्नावारे अन्योलता कायम बा ।
उ स्थानीय तहमे बैंक विस्तार हुई नैसेकलपाछे सदरमुकाममे रहल बैंक शाखामार्फत उ स्थानीयके बैंकिङ कारोबार हुइटी आइल नेपाल राष्ट्र बैंक जनैले बा ।
मने रहल बैंक भर जिल्ला सदरमुकाममे कुह्रियाइल बा । खासकैके प्रदेशके अस्थायी राजधानी धनगढीमे अधिकांश बैंक तथा वित्तीय संस्था केन्द्रीत हुइल बा ।
८८ स्थानीय तह रहल सुदूरपश्चिममे हालसम वाणिज्य बैंकके ६ सय ४७ ठो शाखा कार्यालय रहल बा । ओस्टके, प्रदेशमे रहल ७ सय २ बैंक तथा वित्तीय संस्थामध्ये ३ सय २४ वटा बैंक तथा वित्तीय संस्था तराईके २ जिल्ला कैलाली कञ्चनपुरमे किल केन्द्रित रहल राष्ट्र बैंकके तथ्यांक देखैले बा ।
बैंक तथा वित्तीय संस्थाहुक्रे शहर केन्द्रित हुइलपाछे लगानी फेन शहरमे केन्द्रित हुइल बा । प्रदेश भरके ८५ अर्ब कर्जा मध्ये ७३ अर्व कर्जामे योगदान कैलाली कञ्चनपुरके बिल्गाइल बा । नेपाल राष्ट्र बैंकके अनुसार सुदूरपश्चिमके कर्जा प्रवाह अवस्था देशभरके कर्जासे तुलना कर्लेसे ३ प्रतिशत किल हो ।
प्रदेश सरकार प्रदेशभर वित्तीय साक्षर पुगैना नीति लेले बा । मने बैंक तथा वित्तीय संस्था दुर्गम पहाडी जिल्लामे नैगिलपाछे प्रदेश सरकारके नीति तथा कार्यक्रम कागजमे सीमित हुइना ओत्रही आंशका बह्रल बा ।